Kjo pyetje përmban disa çështje të cilat shpresojmë t’i sqarojmë në këtë artikull.

Së pari, e vërteta nuk mund të përcaktohet nga popullariteti ose jo popullariteti i saj. Fakti që feja Islame rritet dita ditës nuk tregon që ajo është e vërtetë. Nëse do të ishim në Indi, atëherë pa tjetër do konkludonim që feja e vërtetë është Hinduizmi. Për shkak të popullaritetit apo përqindjeve, nëse do të shkonim në lindjen e largme në Azi do konkludonim se feja e vërtetë është Bahai apo ndonjë formë tjetër feje meditimi, nëse do shkonim në lindjen e mesme do konkludonim se feja e vërtetë është Islamizmi, nëse do shkonim në Evropë do konkludonim se feja e vërtetë është Humanizmi. Patjetër që ne nuk e mohojmë faktin se feja Islame është rritur, megjithëse jo aq shumë sa disa statistika pretendojnë, dhe në mjaft vende është rritur me dhunë ose forma të tjera presioni, si psh në mjaft shtete në Afrikë, megjithatë numrat nuk përcaktojnë asgjë. Nëse e vërteta do varej nga numrat atëherë ka më tepër të krishterë në botë sesa muslimanë, ose çfarë konkluzioni do kishte një njeri në vitin 500 pas Krishtit kur Islamizmi nuk kishte lindur akoma?

Prandaj, e vërteta nuk gjykohet nga numri i njerëzve që e besojnë apo kundërshtojnë atë.

Së dyti, Jezusi vetë tha që rruga që të çon në shkatërrim është e gjërë dhe shumë veta janë në atë rrugë.

Mateu 7:13-15

Hyni nga dera e ngushtë, sepse e gjërë është dera dhe e hapur është udha që të çon në shkatërrim, dhe shumë janë ata që hyjnë nëpër të.
Përkundrazi sa e ngushtë është dera dhe sa e vështirë është udha që çon në jetë! Dhe pak janë ata që e gjejnë!
Ruhuni nga profetët e rremë, të cilët vijnë te ju duke u shtënë si dele, por përbrenda janë ujqër grabitqarë.

Këtu nuk bëhet fjalë vetëm për ata njerëz që ne do t’i quanim “të këqinj” por edhe ata njerëz që janë fetarë, por kanë refuzuar flijimin e Perëndisë për mëkatet e njerëzimit, gjakun e Jezus Krishtit në kryq.

Përsa i përket Islamizmit le të theksojmë këto gjëra. Ka shumë muslimanë që janë njerëz të mirë, të drejtë, te ndershëm dhe mësojnë gjëra të mira në fenë e tyre. Këtë nuk e vëmë aspak në dyshim. Megjithëse ka shumë njerëz që abuzojnë në emër të Islamizmit (terroristë apo të kallëpit të tyre), ne nuk kemi gjykuar fenë Islame në bazë të njerëzve të tillë. Ne kemi gjykuar fenë Islame në bazë të thënieve të Kuranit dhe Muhamedit në Hadith, dhe vetë shembullit të profetit Muhamed.

Fakti është që shumica e muslimanëve nuk janë të njohur me ato fakte që ne kemi prezantuar këtu, dhe disa prej tyre nxehen kur lexojnë këto artikuj, pikërisht për këtë arsye. Le të shpjegojmë përsëri, që asnjë gjë e prezantuar në artikujt tanë nuk është shpikur nga ne apo keqinterpretuar. Për çdo gjë që kemi thënë, kemi dhënë referencën përkatëse nga Kurani ose Hadith-i.

Ka dy reagime kryesore kur një musliman mëson shumë nga këto gjëra që ne kemi paraqitur në artikujt në lidhje me fenë Islame. Kategoria e parë përbëhet nga ata që refuzojnë gjithçka negative që faktet prezantojnë në lidhje me fenë Islame, Kuranin dhe Muhamedin. Kjo ndodh sepse ata kanë vendosur se çfarë do të besojnë në lidhje me fenë Islame dhe asnjë fakt nuk ia ndryshon dot mendjen, dhe as nuk duan të dëgjojnë apo të konsiderojnë mundësinë se këto gjëra janë të vërteta. Kategoria e dytë përbëhet nga ata njerëz që pasi ballafaqohen me këto fakte, duan të dinë më tepër nëse këto janë kështu apo jo, atëherë studiojnë burime të ndryshme pro edhe kundër dhe pastaj vendosin në bazë të burimeve që kanë gjetur.
Qëllimi ynë nuk është aspak të ofendojmë fenë Islame apo besimtarët muslimanë. Ne thjesht duam t’i prezantojmë ata me disa fakte që ndoshta asnjë herë nuk do t’i mësonin nga burime Islamike. Dhe meqënëse është besimi ynë se shumë njerëz muslimanë janë njerëz të ndershëm, dhe mirëdashës, atëherë qëllimi ynë është t’i tregojme atyre faktet se historia e Islamizmit është bazuar në parime që edhe ata vetë nuk bien dakord dhe nuk praktikojnë. Pse do të donte një njeri i ndershëm të ndiqte një fe që mëson praktikimin e dhunës, trajtimin degridues të grave, mohimin e të drejtave themelore të njeriut, lejon poligaminë, etj, etj.

Por çështja kryesore nuk është a mëson Islamizmi gjëra të mira apo të keqija, në fund të fundit çdo fe mëson disa gjëra të mira. Unë mund të shpik një fe sot që mëson mjaft gjëra të mira, apo të gjitha gjërat e mira, por kjo nuk do të thotë se unë jam profet i Zotit. Pika kulmore me të cilën çdo fe përballet është Jezus Krishti.

Bibla flet shumë qartë se kush Jezusi dhe çfarë bëri Ai për ne. Islamizmi mohon se Jezusi vdiq në kryq për mëkatet tona dhe u ringjall. Islamizmi mohon se ne mund të marrin faljen e mëkateve nga Perëndia duke besuar tek gjaku i Krishtit. Kjo është çështja kryesore, dhe jo sa gjëra të mira mëson Islamizmi. Padyshim mund të gjesh parime të mira që Islamizmi mëson, por parime të mira i gjen në çdo fe.

Ajo që dallon Krishtërimin nga çdo fe tjetër, është fakti se Krishtërimi mëson se shpëtimi ynë është vetëm në Jezus Krishtin dhe jo meritë e jona. Prandaj çështja qëndron se çfarë besojmë ne për Krishtin.

Nuk është mjaft të themi se Jezusi është një profet, megjithëse Ai ishte i tillë, por Jezusi ishte më tepër se aq. Prandaj të thuash se Jezusi ishte vetëm një profet, në të vërtetë do to thotë të mohosh Atë komplet dhe ta quash atë gënjeshtar. Ai tha që ishte e vetmja rrugë për shpëtim. Kjo thënie është serioze, ose e besojmë ose jo. Nuk ka rrugë të mesme. Nëse nuk e besojmë atëherë e quajmë Atë gënjeshtar, që të ketë thënë diçka që s’është e vërtetë. Islamizmi është ndërtuar i tëri mbi një njeri të vetëm, Muhamedin. Ai ishte i vetmi dëshmitar i vegimeve dhe thënieve të Allahut. Bibla mbështetet në një traditë 1600 vjeçare në shumë njerëz e profetë. Jezusi iu shfaq më shumë se 500 dëshmitarëve pas ringjalljes, shumica e të cilëve dhanë jetën për të nën persekutimin Romak. Si mundet atëherë Muhamedi të thotë se Krishti nuk u ringjall apo nuk vdiq në kryq! Dikush po gënjen, ose Bibla ose Kurani! Nuk ka zgjidhje të mesme. Ne kemi fjalën e një njeriu 600 vjet pas Krishtit kundrejt qindrave që ecën, jetuan me të, dhe e panë atë të kryqëzuar dhe të ringjallur.

Këtu qëndron e gjithë dilema. Në qoftë se Jezus Krishti ishte thjesht një profet do të thotë që ne nuk mund të shpëtohemi me anë të Tij, dhe shpëtimi varet nga veprat që ne bëjmë. Mjaft veta do të preferonin ndoshta që shpëtimi të varej nga veprat e tyre, por le të theksojmë se nëse ata e vendosin besimin tek ato vepra për t’i çuar në parajsë, standarti që Perëndia kërkon nuk është mbi 50% vepra të mira, por 100% vepra të mira sepse Ai vetë është i shenjtë. Prandaj Jezusi vdiq në kryq për ne duke marrë atë mallkim që mëkatet sillnin mbi ne, sepse veprat tona sado të mira nuk arrinin dot drejtësinë e Perëndisë.

Shpresojmë që të kemi sqaruar sadopak pyetjen tënde. Ajo që ne dëshirojmë është thjesht të prezantojmë njerëzit me faktet, dhe është në dorën e tyre nëse do t’i besojnë, refuzojnë, apo injorojnë ato. Lutja jonë është që të paktën secili të shikojë të gjitha anët para se të marrë një vendim.

Zoti të bekoftë dhe faleminderit për pyetjen tënde.

Sinqerisht,

Stafi, Albavizion.com