Faleminderit për pyetjen tënde. Ne të inkurajojmë që të lexosh pyetjen e parë në këtë faqe, pasi ajo shpjegon mjaft gjëra në lidhje me atë që Bibla thotë për pozitën e gruas. Gjithashtu të inkurajojmë që të lexosh (nëse nuk ke lexuar akoma) artikullin “Trajtimi i grave sipas Biblës dhe Kuranit”, pasi ai artikull citon vargjet nga Bibla se si duhet mashkulli të trajtojë gruan e tij.

Atëherë, nëse i ke lexuar këto dy artikuj, tani po japim një përmbledhje të pikave kryesore për të sqaruar më mirë pyetjen tënde.

Bibla mëson këto gjëra në lidhje me rolin e gruas:

1.	Gruaja është krijesë e Perëndisë e barabartë me burrin.
2.	Roli i gruas në familje është i ndryshëm nga roli i burrit.
3.	Mashkulli është caktuar nga Zoti të jetë drejtues i familjes, dhe si i tillë përgjegjës për vendimet që merr.
4.	Burri duhet ta trajtojë gruan me respekt dhe ta dojë atë ashtu si Krishti deshi Kishën dhe dha veten e Tij për të.
5.	Rolet e ndryshme në familje nuk përcaktojnë mosbarazi, por strukturë dhe rend, mjaft i nevojshëm për funksionimin normal të çdo familje.
6.	Mënyra se si familja duhet të funksionojë është një shëmbëlltyrë e marrëdhënies të besimtarëve (Kishës) me Zotin Jezus Krisht.
7.	Sa herë që prishet ky ekuilibër në familje, probleme të mëdha rezultojnë.

Para se të sqarojmë në hollësi këto parime, le të theksojmë një parim që është shumë i rëndësishëm në përgjigjen e çdo pyetje që kemi. Është një gjë mjaft e rrezikshme që të vendosësh se çfarë do besosh në lidhje me një temë të caktuar, dhe pastaj të kërkosh nje fe që bie dakord (ose mëson) atë që ti beson. Unë mund të shpik një fe sot që mëson se femrat janë superiore ndaj meshkujve, por kjo nuk do të thotë se kjo vjen prej Zotit. Prandaj, është e rëndësishme që në rradhë të parë të shikosh faktet pse Bibla është fjala e Zotit, dhe pastaj të studiosh çfarë mëson Bibla dhe kur mendimet tona nuk përputhen me Biblën, atëherë jemi ne që duhet të ndryshojmë mendim, jo Zoti.

Atëherë, pa humbur kohë, le të shpjegojmë pyetjen tënde. Kur Zoti krijoi njeriun, Ai krijoi Adamin të parin, dhe Zoti mendoi që nuk ishte mirë që Ai të ishte vetëm, prandaj krijoi gruan nga brinja e Adamit. Megjithëse Adami dhe Eva u krijuan të dy nga Zoti, dhe ishin krijesa të barabarta përpara Perëndisë, ata u krijuan ndryshe nga njëri tjetri dhe për qëllime të ndryshme. Adami u krijua nga dheu, dhe gruaja u krijua nga brinja e Adamit. Jo më kot meshkujt nuk e kanë problem të merren me punë ku bëhen pis, pasi ata u krijuan nga dheu!

Pastaj Zoti tha që burri dhe gruaja do të bashkohen dhe të dy do të bëhen një mish i vetëm. Pra, martesa, për Zotin është akti ku dy bëhen një. Le të mos harrojmë që megjithëse Zoti i krijoi si mashkullin ashtu edhe femrën ata u krijuan ndryshe. Ky ndryshim nuk ka të bëjë me barazinë, por me funksionin. Gruaja u krijua nga brinja e Adamit dhe kjo jo më kot. Zoti nuk e krijoi gruan nga këmbët e Adamit që ai të mbizotëronte mbi gruan dhe ta shtypte, as nga koka që ajo të drejtonte burrin, por nga brinja. Kjo tregon se roli i gruas është pikërisht për të ruajtur dhe mbrojtur gjënë më të çmuar në burrin e saj, zemrën. Ne e dimë se brinjët shërbejnë si një mbrojtje e organeve vitale të jetës. Ky është roli i gruas në familje. Meqënëse përmendëm se Zoti tha se të dy do të bëhen një, kur një burrë dhe një grua bashkohen, dhe të dy duhet të jenë një, nëse nuk ka disa rregulla si ato që Zoti ka caktuar në Bibël, atëherë pasojat janë të mëdha.

Ne nuk mund të neglizhojmë faktin se burri dhe gruaja janë ndryshe nga njëri tjetri. Ky ndryshim, siç përmendëm disa herë nuk është në barazinë si krijesa përpara Zotit, por është në gjini, ana fizike, ana emocionale, etj. Meshkujt dhe femrat nuk mendojnë njësoj, proçesi i mendimit është komplet ndryshe. Meshkujt dhe femrat nuk reagojnë njësoj në fushën e ndjenjave. Atëherë, kur të dy bëhen një mish, nëse të dy do të ishin njësoj përgjegjës për drejtimin e familjes, kjo do të sillte pasoja. Kjo do të ishte njësoj si një krijesë me dy koka ku të dy po mundohen t’i thonë trupit se çfarë duhet të bëjë. Kjo është njësoj si të kesh një makinë me dy timona, dhe secili shofer vendos vetë se ku do të shkojë. Kjo nuk është e frytshme, madje është e rrezikshme.

Prandaj, Zoti i dha burrit përgjegjësinë e drejtimit të familjes dhe gruas rolin mbrojtjës dhe ruajtjes së këtij ekuilibri në familje. Pse i ndau rolet Zoti në këtë mënyrë, është punë e Tij, dhe ne nuk mund të japim përgjigje për këtë, por kjo nuk do të thotë se burri nuk duhet të pyesi gruan për asnjë gjë, por do të thotë se është detyra dhe përgjegjësia e burrit (në fund të fundit) se si e drejton familjen e tij. Le të mos harrojmë se me këtë privilegj vjen edhe përgjëgjësia. Dmth, nëse burri vendos të marrë një vendim të caktuar për familjen dhe ky vendim është i gabuar, atëherë është burri ai që jep llogari para Zotit për këtë gabim, jo gruaja. Ky parim shikohet qartë se kë mbajti Zoti përgjegjës për ardhjen e mëkatit në botë:

Romakeve 5:12

Prandaj, ashtu si me anë të një njeriu të vetëm mëkati hyri në botë dhe me anë të mëkatit vdekja, po ashtu vdekja u shtri tek të gjithë njerëzit, sepse të gjithë mëkatuan;

Në fakt ishte Eva ajo që mëkatoi e para, jo Adami, megjithatë Zoti thotë që mëkati hyri në botë me anë të Adamit, sepse ai ishte përgjegjës për drejtimin e familjes, prandaj Zoti i kërkoi atij llogari për mëkatin.

Pra, marrëdhënia burrë-grua në familje duhet të funksionojë në mënyrën se si Zoti e ka caktuar. Burri është drejtuesi i familjes dhe përgjegjës për vendimet e marra. Gruaja ndjek drejtimin e burrit të saj për familjen dhe ruan ekuilibrin e paqes në familje. Në fund të fundit, pasazhi në Bibël që jep këtë urdhërim, fillon duke vendosur kontekstin duke thënë:

Efesianëve 5:21

nënshtrohuni njëri-tjetrit në druajtjen e Krishtit!

Pra, gruaja nuk është skllave e burrit, apo robot, që burri të shtypë një buton edhe ajo të bëjë atë gjë, por të dy duhet të konsultohen me njëri-tjetrin për planin e Zotit për familjen e tyre.

Ka edhe nje arsye tjetër pse burri është caktuar drejtues i familjes. Në Bibël, kisha quhet nusja e Krishtit.
Ky krahasim është dhënë për të shpjeguar faktin se Krishti na do pa kufi dhe kujdeset për ne. Kisha ndjek drejtimin e Krishtit dhe Ai siguron për ne. Ashtu si Krishti është i njëjtë me Perëndinë At, ashtu edhe gruaja është e njëjtë me burrin, por pozitat janë të ndryshme. Kjo e gjitha është në funksion të rregullit në familje dhe shoqëri.

Kjo është ajo që Bibla mëson në lidhje me këtë temë. Pra, si përmbledhje, sipas Biblës roli i burrit dhe gruas në familje, nuk ka të bëjë me superioritetin apo inferioritetin, por ka të bëjë me faktin që të dy kanë role të ndryshme për të arritur unitetin dhe paqen e duhur në familje. Tani, përgjegjësia jonë është të themi se çfarë mëson Bibla në këtë fushë, dhe jo çfarë bëjnë fetë e ndryshme, qofshin këto edhe kisha të ndryshme. Nëse një kishë nuk vepron sipas Biblës, kjo është puna e tyre, por ne nuk duhet t’ia hedhim fajin Zotit apo Biblës për sjelljen e tyre. Bibla na mëson të sillemi ashtu siç kemi shpjeguar në këtë artikull, nëse njerëzit i binden apo jo, kjo është puna e tyre përpara Zotit. Nga ana tjetër nuk duhet të gjykojmë çfarë ka thënë Zoti sepse ka njerëz besimtarë që nuk i binden fjalës së Tij. Prandaj në analizën tonë në të gjithë artikujt nuk jemi marrë me çfarë bëjnë apo besojnë besimtarë të ndryshëm, por çfarë thonë burimet e besimit të tyre, psh Bibla apo Kurani, sepse ka më tepër rëndësi të studiosh çfarë thonë librat në të cilat këto fe mbështeten, sesa a i binden tamam besimtarë të ndryshëm këtyre librave. Psh, është çmenduri t’i hedhesh fajin Krishit apo Biblës për pjesëmarrjen e Kishes Ortodokse Serbe në politikën e masakrave në Kosovë, kur dihet qartë se ata nuk ndjekin Biblën. Prandaj, nëse ju keni një shembull të keq para syve tuaj në lidhje me marrëdhëniet burrë-grua, ne po ju shpjegojmë çfarë mëson Bibla në lidhje me këtë, dhe është përgjegjësia jonë të gjejmë një kishë që mëson dhe sillet sipas Bibles.

Prandaj, unë nuk shoh asnjë parim në Bibël që të kufizojë të drejtat personale, shoqërore, apo familjare të gruas, siç thua ti. Fakti që Zoti ka caktuar role të ndryshme në familje nuk do të thotë mosbarazi apo mohim i të drejtave. Megjithëse mashkulli dhe femra jane krijuar të barabartë si qënie njerëzore, kjo nuk do të thotë se ata janë të njëjtë në çdo anë tjetër. Vetëm një i marrë mund të mohojë ndryshimet midis burrit dhe gruas. Dhe nëse ju duket e padrejtë që Zoti të ketë caktuar burrin si drejtues të familjes dhe jo gruan, dhe nëse kjo ju duket pabarazi, atëherë duhet të kërkoni barazinë në çdo fushë tjetër të jetës, si psh punën në gurrore, kanalet e ujërave të zeza, shtrimi i rrugëve me asfalt gjithë ditën në diell, miniera, mbledhja e plehrave publike, ndeshjen e femrave me meshkuj në boks, etj, etj.

Për mendimin tonë kjo që po shpjegojmë është praktike, meqënëse pyetet për praktikën e përditshme. Sa gra mezi do prisnin të ngriheshin në mëngjes për t'u lyer me zift duke shtruar rrugët? Mos mendoni vetëm për burrat që janë me pozitë, ka plot të tjerë që nuk janë të tillë!

Sipas Biblës burri duhet të ndihmojë gruan me çdo gjë që ka nevojë, megjithatë siç shpjeguam më lart, detyrat janë të ndryshme. Këto përgjegjësi nuk i ndan njeri me një listë fikse të pandryshueshme, por Bibla jep shembuj të ndryshëm. Sugjerojmë që të lexoni Fjalët e Urta 31, për një kapitull të mrekullueshëm mbi gruan e virtytshme. Në fund të kapitullit thuhet:

Bijtë e saj ngrihen dhe e shpallin fatlume; edhe burri i saj e lëvdon duke thënë:
"Shumë bija kanë bërë gjëra të mëdha, por ti i kalon të gjitha ato".
Hiri është i rremë dhe bukuria është e kotë, por gruaja që ka frikë nga Zoti është ajo që do të lëvdohet.
I jepni frytin e duarve të saj, dhe vet veprat e saj le ta lëvdojnë te portat.

Ky kapitull shpjegon qartë se burri i një gruaje të tillë nderohet nga të tjerët, gruaja vetë nderohet nga burri dhe nga fëmijët e saj.

Siç thamë edhe më lart, kjo është ajo që Bibla mëson. Megjithëse çdo njeri e ka në dorë vetë se çfarë do besojë, është mendimi ynë se asnjë sistem tjetër nuk është më i mirë nga ai që ka caktuar Bibla. E vërteta është që nëse një njeri nuk ka këtë qëndrim ndaj Biblës dhe grave në përgjithësi, atëherë gratë gjithmonë do të trajtohen (në botën jobesimtare) nga pamja e tyre, dhe sa tërheqëse janë për meshkujt dhe asnjëherë nuk do të trajtohen të barabarta. Ose në anën tjetër, ato do të trajtohen si vegla nga fanatikë të feve të ndryshme.

Le të themi në mbyllje se standarti i Biblës për trajtimin e grave është shumë më i lart nga çdo standart tjetër.

Burrat duhet t’i trajtojnë gratë e tyre duke i çmuar ato.

1Pjetrit 3:7

Ju burra, gjithashtu, jetoni me gratë tuaja me urtësi, duke e çmuar gruan si një enë më delikate dhe e nderoni sepse janë bashkëtrashëgimtare me ju të hirit të jetës, që të mos pengohen lutjet tuaja.

Ky varg është i rëndësishëm sepse mëson qartë që një nga pengesat e përgjigjes se lutjeve të besimtarëve të krishterë është kur ata nuk i trajtojnë gratë e tyre mirë.

Burri duhet ta dojë gruan ashtu si Krishti deshi Kishën.

P.sh. tek Efesianëve 5:25 Bibla thotë:

Ju, burra, t`i doni gratë tuaja, sikurse edhe Krishti ka dashur kishën dhe e ka dhënë veten e vet për të.

Shpresojmë që kjo përgjigje të ketë sqaruar pyetjen tuaj sadopak. Faleminderit për pjesëmarrjen tuaj në Albavizion.com. Zoti ju bekoftë.