Trajtimi i grave sipas Biblës dhe Kuranit!
 
     

Një nga temat më prekëse kur vjen puna rreth debateve midis të krishterëve dhe muslimanëve është ajo e trajtimit të grave. Këtu nuk bëhet fjalë vetëm për perçet, dhe në fakt as që do të merremi me perçet në këtë artikull. Nëse gratë muslimane duan ta mbulojnë veten e tyre, kjo është puna e tyre, përpara burrave të tyre, por në shoqërinë e shekullit 21, trajtimi i grave është shpesh herë në qendër të vëmendjes.

Këtu nuk do të sjellim shembuj se si filani ka trajtuar gruan e tij, por do të shohim nga burimet e të dy besimeve, pra Bibla dhe Kurani se si duhet të trajtohen gratë dhe çfarë mësojnë këto libra vetë.

Shpesh herë në forume apo diskutime të ndryshme lexon nga gra muslimane që shkruajnë se janë shumë të lumtura në islam dhe mënyrën si trajtohen nga burrat e tyre. Le të themi se së pari për çdo dëshmi të tillë ne mund të sjellim 100 të tjera që thonë komplet ndryshe, por kjo nuk është mënyra e drejtë, dhe në vend që të merremi me llafe e thashetheme, se si e trajtoi ky atë, dhe çfarë i bëri ai asaj, më mirë shikojmë vetë nga librat e shenjtë të dy feve.

Në qoftë se një grua muslimane trajtohet me nder e respekt nga burri i saj, ne jemi të lumtur për këtë gjë, por kjo nuk është si pasojë e ndekjes së Kuranit, në të kundërt kjo është pasojë e mos ndjekjes së Kuranit, sepse nëse një njeri do ndjekë Kuranin, shikoni se si do të sillet:

1. Dëshmia e një gruaje vlen sa gjysma e dëshmisë së një burri.

Sura 2:82

Kërkoni të dëshmojnë dy dëshmitarë burra nga mesi juaj, e në qoftë se nuk janë dy burra, atëherë një burr e dy gra, nga dëshmitarët që i pëlqeni. (Dy gra në vend të një burri)

Siç do e shohim edhe më poshtë, jo vetëm që Kurani nuk mëson barazinë e burrit me gruan, por në të kundërt gratë shikohen si qënie më të ulta. Pse duhet të jetë dëshmia e një gruaje sa gjysma e një burri? Çfarë kanë burrat 4 sy dhe gratë 2? Meqë ra fjala, unë që e shkruaj këtë artikull jam burrë, jo grua! Është ofenduese të shikosh muslimanët të citojnë vargje të ndryshme nga Kurani që gjoja mësojnë barazinë e burrit dhe gruas. Këto vargje që po citojmë janë të qarta se çfarë mëson Kurani.

2. Burrat mund të rrahin gratë e tyre.

Sura 4:34

Burrat janë përgjegjës për gratë, ngase All-llahu ka graduar disa mbi disa të tjerët dhe ngase ata kanë shpenzuar nga pasuria e tyre. Prandaj, me atë që All-llahu i bëri të ruajtura, gratë e mira janë respektuese, janë besnike ndaj të fshehtës. E ato që keni dro kryelartësisë së tyre, këshilloni, madje largohuni nga shtrati (e më në fund), edhe rrahni (lahtë, nëse nuk ndikojnë këshillat as largimi), e nëse ju respektojnë, atëherë mos u sillni keq ndaj tyre. All-llahu është më i larti, më i madhi.

Si mund të pretendojë dikush barazi midis gruas dhe burrit në islam nëse burrat mund të rrahin gratë e tyre? Përkthimi i disa versioneve të Kuranit thotë në kllapa që ti rrahin lehte gratë, kur në fakt në disa përkthime të tjera është përkthyer rrihni rëndë ose fshikulloni. E njëjta fjalë në arabisht që është përkthyer këtu rrihni (lehtë), është përdorur për rrahjen e kafshëve (gamileve) dhe kriminelëve. Por nejse, çfarëdo rrahje të jetë, kur Kurani i jep të drejtë një burri të rrahi gruan, më thoni ju se po vajti puna deri tek e rrahura një burrë do ndalojë të sigurohet që po e rreh lehtë dhe jo rëndë gruan e tij?!!! Pastaj kush është përkufizimi i fjalës lehtë?


3. Burrat mund të martohet deri me 4 gra.

Sura 4:3

Në qoftë se frikoheni se nuk do të jeni të drejtë ndaj bonjakëve, atëherë martohuni me ato gra që ju pëlqejnë; me dy, me tri e me katra. E nëse i frikoheni padrjtësisë (ndaj tyre), atëherë vetëm me një, ose (martohuni) me ato që i keni nën pushtetin tuaj (robëreshat). Ky (përkufizim) është më afër që të mos gaboni.

Kuptohet që ky ligj nuk vlente për Muhamedin, pasi ai kishte bekimet e mëdha të Allahut dhe lirinë të martohej me nga 9-22 gra.

Pra, të kthehemi edhe një herë tek barazia e burrit me gruan. Një burrë mund të martohet me katër gra njëherësh (dhe ti divorcojë kur të dojë ai, siç do shohim më poshtë), por gruaja nuk ka të njëjtat të drejta. Nga njëra anë është më mirë që nuk martohen dot me katër burra, e merrni dot me mend çdo të ndodhte sikur secili të inatosej e ta rrihte atë një herë në ditë? Nejse, kjo është hipotezë Atëherë, si mund të pretendojnë muslimanët se Kurani predikoka barazi? Barazi do të thotë 1 = 1 jo 1 = 4! Shkoni në çdo klasë të parë në botë dhe po i thatë kalamajve se 1 = 4 ata do të tallen me ju, por fatkeqësisht ka shumë të rritur që e hanë (dmth besojnë) këtë lloj shpjegimi.

Tani le të flasim specifikisht. Cili baba mezi pret tja japë vajzën e tij një burri të martuar me 1, 2 apo tre gra të tjera? Cila grua mezi pret të martohet me një burrë të martuar? E dini sa probleme sociale sjell një gjë e tillë? Kjo shkakton aq shumë probleme saqë edhe në vendet islamike ku poligamia është e ligjshme, kjo nuk praktikohet në masë. Mendoni pak vetëm xhelozinë midis grave! Po xhelozinë ndaj fëmijëve me gruan apo gratë e tjera? Si mund të ketë paqe në një familje të tillë? Në një familje me dy prindër shumë fëmijë ndihen sikur nuk trajtohen njësoj, po çbëhet vallë në një familje, nëse mund ta quajmë të tillë, me fëmijë nga deri katër gra të ndryshme me të njëjtin baba që jetojnë në një shtëpi?

Një mësim i tillë është katastrofë e pashmangshme. Por Kurani e lejon një gjë të tillë. Edhe njerëzit vetë në këto shoqëri e dinë fare mirë që kjo nuk është as praktikë as normale që të praktikohet, si shpjegohet atëherë se Zoti i gjithësisë të mos e dijë një gjë të tillë.

Kjo shpjegohet shumë lehtë, Muhamedi mblodhi zakonet e shekullit të shtatë në Arabi dhe i përfshiu të tëra në fenë islame.


4. Burrat i divorcojnë kur të duan pa shkak gratë e tyre.

Sura 66:5

Nëse ai u ka lëshuar juve, është detyrë e Zotit të tij t'i bëjë atij zëvendsim me gra edhe më të mira se ju; muslimane, besimtare, respektuese, penduese, adhuruese, emigruese që kanë qenë të martuara ose virgjëresha.

Sura 33:51

Ti je i lirë të lëshosh atë që don prej tyre dhe të mbash pranë vete atë që don, e edhe të kërkosh afrimin e asaj nga e cila ke qenë larguar, dhe nuk ke mëkat. Kjo është më së afërmi që ato të qetësohen shpirtërisht e të mos brengosen dhe të jenë të kënaqura me atë që ti u ofron të gjitha atyre. All-llahu e di çka mbani në zemrat e tuaja, All-llahu është më i dijshmi, më i buti.

A shikoni ju ndonjë kriter për divorc këtu? Absolutisht jo. Nëse një muslimani i duket se gruaja e tij nuk është më e re dhe e freskët për të kënaqur dëshirat e tij, apo thjesht sheh një tjetër që e kënaq më shumë, atëherë i jep duart asaj pa asnjë shpjegim, dhe martohet me tjetrën, por gratë nuk kanë të njëjtin privilegj!!! Kjo quhet barazi? Si mund të thotë një grua që kjo është barazi apo e pranueshme? Fakti që burri juaj mund të mos e ketë bërë këtë nuk është meritë e Kuranit, është meritë e faktit se Zoti i ka dhënë atij një ndërgjegje që i thotë atij se kjo është gabim, pavarësisht se çfarë thote Kurani. Si mundet një grua të mos shikojë se sipas Kuranit ajo është thjesht një lodër që hidhet sa nga duart e njërit në të tjetrit, dhe kur nuk e kënaq më dikë, hidhet jashtë!

5. Muhamedi tha që gratë janë më të ulta në njohuri.

Volumi 3, Libri 48, Numër 826:

Profeti tha, A nuk është dëshmia e një gruaje e barabartë me gjysmën e dëshmisë së një burri? Gruaja tha, Po. Ai tha, Kjo është për shkak të ultësisë së mendjes së gruas.

Volumi 2, Libri 24, Numër 541:

Unë nuk kam parë ndonjë më të ulët në inteligjencë dhe fe sesa ju

Kjo edhe mund të ketë qënë e vërtetë në kohën e Muhamedit kur ashtu sic i trajtonin ata gratë, nga do mësonin gratë më shumë, por një profet duhet të ketë pak dituri të shkretën për të ardhmen, apo jo? Më thoni ju sot që burrat arabë kanë më tepër njohuri dhe inteligjencë sesa gratë perëndimore?

6. Muhamedi tha që shumica e banorëve në ferr janë gra.

Volumi 2, Libri 18, Numër 161:

unë pashë gjithashtu flakët e ferrit dhe nuk kisha parë kurrë një pamje më të tmerrshme. Pashë se shumica e banorëve ishin gra

Më kot mundohen muslimanët të gjejnë vargje që gjoja mësojnë barazinë e burrit dhe gruas. Vargjet më lart flasin qartë dhe janë pikërisht përshkrim i shoqërisë në arabi në shekullin e shtatë. Çdo shoqëri që ndjek Kuranin kthehet në atë shekull dhe në atë shoqëri. Sa më larg Kuranit të jenë aq më shumë shpresa kanë për civilizim. Këto janë fakte. Shikoni vendet arabe sot dhe na thoni që jemi gabim! Padyshim jo të gjithë burrat muslimanë i trajtojnë gratë e tyre në këtë mënyrë, as që po e nënkuptojmë një gjë të tillë, por nëse ata do ta ndiqnin Kuranin 100%, do i trajtonin në këtë mënyrë! A e dini ju se sa gra përmenden me emër në Kuran? Le tja u shuajmë ne kureshtjen, vetëm një, Maria (Merjeme), nëna e Jezusit. Thoni atëherë që Kurani mëson barazinë e burrit me gruan?!


Çfarë thotë Bibla për këtë temë? Shikoni, lexoni, dhe kontrolloni vargjet e mëposhtme:


1. Burri dhe gruaja janë krijesa të barabarta.

Galatasve 3:28

Nuk ka as Jude, as Grek, nuk ka as skllav as të lirë, nuk ka as mashkull as femër, sepse të gjithë jeni një në Jezu Krishtin.


1Korintasve 11:11,12

Gjithsesi në Zotin as burri s`është pa gruan, as gruaja pa burrin,
sepse sikurse gruaja vjen nga burri, ashtu edhe burri lind nëpërmjet gruas, dhe çdo gjë vjen nga Perëndia.

2. Martesa është midis një burri dhe një gruaje.


Mateu 19:3-6,9

Atëherë iu afruan disa farisenj për ta provokuar dhe i thanë: ``A është e lejueshme që burri ta ndajë gruan për një shkak çfarëdo?``.
Dhe ai, duke u përgjigjur u tha atyre: ``A nuk keni lexuar ju, se ai që i krijoi që në fillim, i krijoi mashkull dhe femër?
Dhe tha: "Për këtë arsye njeriu do ta lërë babanë dhe nënën e vet dhe do të bashkohet me gruan e vet; dhe të dy do të jenë një mish i vetëm".
Dhe kështu ata nuk janë më dy, por një mish i vetëm; prandaj atë që Perëndia ka bashkuar, njeriu të mos e ndajë``.
Por unë ju them se kushdo që e lëshon gruan e vet, përveç rastit të kurvërisë, dhe martohet me një tjetër, shkel kurorën

3. Burrat nuk mund ti divorcojnë gratë e tyre kur të duan apo pa shkak, vërveç rastit të tradhëtisë bashkëshortore.

Mateu 19:3-6,9

Atëherë iu afruan disa farisenj për ta provokuar dhe i thanë: ``A është e lejueshme që burri ta ndajë gruan për një shkak çfarëdo?``.
Dhe ai, duke u përgjigjur u tha atyre: ``A nuk keni lexuar ju, se ai që i krijoi që në fillim, i krijoi mashkull dhe femër?
Dhe tha: "Për këtë arsye njeriu do ta lërë babanë dhe nënën e vet dhe do të bashkohet me gruan e vet; dhe të dy do të jenë një mish i vetëm".
Dhe kështu ata nuk janë më dy, por një mish i vetëm; prandaj atë që Perëndia ka bashkuar, njeriu të mos e ndajë``.
Por unë ju them se kushdo që e lëshon gruan e vet, përveç rastit të kurvërisë, dhe martohet me një tjetër, shkel kurorën

4. Burrat duhet ti trajtojnë gratë e tyre duke i çmuar ato.

1Pjetrit 3:7

Ju burra, gjithashtu, jetoni me gratë tuaja me urtësi, duke e çmuar gruan si një enë më delikate dhe e nderoni sepse janë bashkëtrashëgimtare me ju të hirit të jetës, që të mos pengohen lutjet tuaja.

Ky varg është i rëndësishëm sepse mëson qartë që një nga pengesat e përgjigjes se lutjeve të besimtarëve të krishterë është kur ata nuk i trajtojnë gratë e tyre mirë.


5. Burri duhet ta dojë gruan ashtu si Krishti deshi Kishën.


P.sh. tek Efesianëve 5:25 Bibla thotë:

Ju, burra, t`i doni gratë tuaja, sikurse edhe Krishti ka dashur kishën dhe e ka dhënë veten e vet për të.

Nëse ka ndonjë varg tjetër që i vë kapakun kësaj teme, është pikërisht vargu i mësipërm. Burrat urdhërohen ti duan gratë e tyre ashtu si Krishti deshi kishën. E dini ju si e deshi Krishti kishën? Ai e deshi aq shumë kishën saqe dha veten e vet për të. Në të njëjtën mënyrë burrat duhet ti duan gratë e tyre që po qe nevoja të japin edhe jetet e tyre për to. Krishti e deshi kishën (dhe të gjithë njerëzit) kur ne nuk ishim të përsosur, me gjithë fajet apo dobësitë tona, ai na deshi pa kushte. Në këtë mënyrë urdhërohen besimtarët ti duan gratë e tyre. Krishti na do pa kushte, pavarësisht nga pamja, rraca, inteligjenca, pasuria, apo ndonjë faktor tjetër. Kështu duhet që burrat ti duan gratë e tyre.

Shpresojmë që ju ti kini kushtuar vëmendje këtij artikulli, pa dallim nëse jeni mashkull apo femër. Vargjet flasin vetë, ne ju kemi dhënë të gjitha referencat dhe i kemi cituar që ti lexoni dhe ti kontrolloni që janë ashtu. Prandaj e theksuam që në artikullin e parë, se islamizmi nuk ka kuptim. Ata thonë se çifutët dhe të krishterët e kanë korruptuar fjalën e Zotit (Allahut). Dmth, pa folur gjatë për fushat e tjera, meqë jemi tek tema e trajtimit të grave, sipas atyre që muslimanët thonë, del se Zoti i vërtetë (Allahu) na thotë ti trajtojmë gratë si kafshë dhe lodra seksi për përmbushjen e epsheve seksuale, dhe kur sna kënaqin më ti hedhim dhe marrim lodra të tjera më të reja e më të bukura, por çifutët dhe të krishterët, idhujtarët dhe të kafirët, shtrembëruan fjalën e Zotit duke thënë që burrat duhet ti duan gratë e tyre aq sa të japin edhe jetën për to, ti trajtojnë me respekt dhe ti çmojnë ato si ene delikate. A ka kuptim kjo për ju?


Po çfarë, mos vallë i shpikëm ne këto gjëra? Lexoni referencat në Kuran. I kemi cituar më lart. Kurani dënon vetveten.


Në përfundim, le të themi se dashuria më e madhe u shfaq në kryqin e Kalvarit, ku Jezusi shkoi me vullnet të lirë, për të marrë dënimin e drejtësisë së Perëndisë për mëkatet e botës, në mënyrë që bota të shpëtohet duke besuar në të. A e keni pranuar ju këtë dashuri në jetën tuaj?


Nëse keni dëshirë të mësoni se çdo të thotë të pranosh Jezus Krishtin, ju lutem kliko këtu. Zoti ju bekoftë.


Shënim për besimtarët muslimanë: Në këtë artikull nuk jemi përpjekur aspak që të ofendojmë apo të ulim fenë islame, ne thjesht kemi prezantuar faktet e njohura nga burimet islamike. Ju inkurajojmë që nëse nuk ishit të njohur me këto fakte më parë, të mos i refuzoni ato, por të kontrolloni vetë ato që kemi thënë me referencat e Kuranit apo Hadith-it. Për këtë arsye kemi cituar vargje konkrete nga Kurani. Faleminderit për mirëkuptimin.

Të gjitha referencat e Kuranit janë marrë nga përkthimi në shqip i Kuranit nga Sherif Ahmeti. Referencat janë cituar ashtu sic gjenden në Kuran pa ndryshuar asgjë, prandaj gabimet gramatikore, gjuhësore, apo drejtshkrimore nuk jane korrigjuar për arsye se dëshironim që të citonim Kuranin ashtu sic është, pa ndryshuar asgjë. Ky version i Kuranit mund të gjendet në internet tek: www.albislam.com/kurani/. Për shkak të vërtetësisë së informacionit të prezantuar këtu, ju inkurajojmë që të verifikoni vetë çdo citim nga Kurani për të gjitha referencat që kemi dhënë.

Për shkak të pamundësisë për të gjetur Hadith-et në shqip, të gjitha referencat nga Hadith-et janë marrë nga burimet islamikë të Hadith-it në anglisht dhe janë përkthyer me saktësinë më të madhe. Të gjitha citimeve të bëra nga Hadith-i mund ti referoheni tek: http://www.usc.edu/dept/MSA/fundamentals/hadithsunnah/bukhari/


   

 
 

Artikuj PyetjeKomenteFotografiKontakt

2003 Albavizion.com. Çdo material i botuar ne kete website eshte shkruar nga Albavizion.com, me perjashtim te artikujve qe thone ndryshe. Ne rezervojme te gjitha te drejtat e autorit. Ne inkurajojme vizitoret qe te perdorin keto materiale per qellimet e tyre, me leje nga Albavizion.com. Asnje referim i ketij materiali nuk mund te perdoret jashte kontekstit te shkrimit dhe per qellim abuzimi , keqperdorimi, ose disktretitimi kundrejt Albavizion.com.