Kjo është pyetje shumë e mirë. Dhe përgjigja është mjaft e thjeshtë: nuk duhet të dëgjoni çfarë them unë. Ndryshimi midis asaj që unë kam thënë në këtë website, dhe shumicës së njerëzve, qëndron në burimin e fjalëve. Unë nuk i kam shpikur vetë asnjë nga temat e artikujve që prezantoj që këtë website. Unë thjesht citoj nga Bibla ato që Zoti thotë. Njerëzit shpikin lloj-lloj teorish dhe filozofish, që janë ndryshe nga njëra-tjetra, atëherë ku ta dinë njerëzit e shkretë se kujt t’i besojnë?! Dhe në qoftë se nuk ka një standart të drejtë me të cilin mnd të krahasojnë çdo gjë që njerëzit thonë, atëherë nuk dinë kujt t’i besojnë. Por Bibla thotë, “Fjala e Perëndisë është e vërteta” (Gjoni 17:17). Kjo është si puna e parave falso. Nuk është nevoja të dish se në sa mënyra munden njerëzit të falsifikojnë paratë, as nuk është e nevojshme të studiosh të tëra llojet e falsifikimeve që ekzistojnë. Mjafton që thjesht të studiosh origjinalen dhe të vërtetën, dhe çdo gjë tjetër që është ndryshe nga ajo është falso. Në të njëjtën mënyrë, unë këtu nuk kam shprehur thjesht mendimet e mija, por gjithmonë kam cituar ato që Zoti thotë në Bibël, dhe inkurajoj të gjithë lexuesit që t’i kontrollojnë ato. Atëherë, a duhet të më dëgjoni mua? Jo nuk duhet, por nëse ato që unë po them janë sipas Biblës, atëherë përgjegjësia bie mbi ju që të ndiqni Fjalën e Zotit, dhe kjo është edhe lutja ime për ju.