Shpesh herë dëgjon nga shtypi ose figura të caktuara, akuza kundër të krishterëve se po e copëtojnë vendin, dhe po i mashtrojnë shqiptarët duke i bërë pjesë të sekteve të ndryshëm, dhe po sjellin humbjen e identitetit të kombit. Në lidhje me këto akuza citojnë shprehjen e famshme nga Pashko Vasa “Feja e shqiptarit është shqiptaria”. Kuptohet që kur Pashko Vasa (gjithashtu i quajtur Vaso Pasha) e shkroi atë thënie, kushtet ishin mjaft të ndryshme. Nën pushtimin osman Shqipëria pothuajse e kishte humbur indentitetin e vet dhe një thënie e tillë duhet kuptuar në atë kontekst, ku shqiptarët u detyruan me dhunë dhe taksa të ndryshonin fenë e tyre në muslimanizëm. Tani do sqarojmë disa gjëra, siç thuhet shpesh “të rrimë shtrembër e të flasim drejt”, që do të thotë se do të themi të vërtetën megjithëse kjo e vërtetë mund të na dhembi të gjithëve si Shqiptarë. E dini pse e përdorin këtë shprehje shtypi apo politikanët, apo shkrimtarë e artistë? Shumë prej tyre e përdorin këtë sepse urrejnë krishtërimin dhe Jezus Krishtin, se po kesh dy pare mend në kokë dhe po të shohësh se ç'po ndodh në vend, atëherë nuk mund të bësh një deklaratë të tillë. Doni të flisni për fenë e Shqiptarit? Ok, le të flasim për të. Të shohim sa burrëri keni ju për të pranuar të vërtetën!

Feja e Shqiptarit është Shqiptaria, do të thotë që Shqiptari vë Shqipërinë mbi çdo gjë tjetër. Unë nuk e di ku jetoni ju që keni një mendim të tillë, dhe sa vjet keni që flini gjumë, por nëse keni qënë zgjuar për këto 13 vitet e fundit atëherë keni parë qartë se feja e Shqiptarit ka qënë çdo gjë tjetër përveç Shqiptarisë. Shqiptarët shitën motrat e tyre në prostitucion, droguan fëmijët dhe vëllezërit e tyre me drogë, vodhën njëri tjetrin në çdo formë e mënyrë të dëgjuar apo padëgjuar më parë, vranë njëri tjetrin për një fjalë goje, apo për 10 centimetra gardh të lëvizur në pronën e tyre, helmuan njëri tjetrin me produkte të falsifikuara, korruptuan çdo formë të drejtësisë, administratës, që nga instancat më të ulta e deri tek koka e vendit, shitën interesat e vendit për përfitime personale, i nxorën një nam të keq Shqipërisë në gjithë Evropën e më tej, prishën shkollat, vodhën institucionet e arsimit deri në pllakat e banjos, prishën shtyllat elektrike, vodhën telat e tensionit të ulët e të lartë për të ndërtuar gardhin e tyre, e plot e plot të tjera, që s'i numëron dot njeri! Dhe ju më thoni se feja e Shqiptarit është Shqiptaria? Flini gjumë zotëri atë bëni, edhe zgjohuni vetëm kur do të jepni një deklaratë për shtyp, apo kur ju vjen rradha të dilni në televizor. Edhe ju thoni që krishterimi po cënon indentitetin e Shqiptarëve? Shqiptarët sot janë të etur për para, mashtrojnë, vjedhin, gënjejnë, i tërë boshti i jetës së tyre rrotullohet rreth parasë dhe fitimit dhe ju më thoni që krishtërimi po cënon identitetin e Shqiptarëve? Ju nuk dini çfarë flisni! Po, ne na vjen keq që vendi ynë është katandisur në këtë pikë, dhe na dhemb në zemër kur flasim për gjëra të tilla, por këto janë të vërteta, megjithëse na vjen keq që t'i pranojmë, nuk mund të mbyllin sytë dhe të pretendojmë se këto gjëra nuk egzistojnë.

Nëse ka një shpresë për Shqipërinë kjo shpresë është në Zotin, jo nga besimi në politikë apo shtypin Shqiptar. Krishtërimi do t'i sjellë identitetin Shqiptarëve jo ta cënojë atë.

Në qoftë se Shqiptarët do të ktheheshin tek Zoti dhe Fjala e Tij Bibla, kjo do të thotë që do të hiqnin dorë nga të gjitha ato dallavere dhe pisllëqe që bëjnë, që do të thotë se do t'i kthejnë kombit atë dinjitet dhe identitet që të gjithë dëshirojmë që ta ketë. Por deri atëherë as që bëhet fjalë për identitet të Shqiptarëve. Njerëz që bëjnë deklarata të tilla dhe sulmojnë Krishtërimin tregojnë injorancën e tyre, dhe nuk ka rëndësi nëse qënkan këta edhe kokat e vendit apo shkrimtarët më të shquar. Ne i pamë frytet e vendimit për të “zhdukur” Zotin nga Shqipëria, gjatë viteve të komunizmit. Tani është koha të kthehemi tek Zoti sa nuk është vonë. Zoti ju bekoftë.