Në këtë artikull do të bëjmë disa llogari. Jezusi flet shpesh për rëndësinë e llogaritjeve. Le të shohim një nga këto pasazhe:

Luka 14:28,29

Kush nga ju, pra, kur do të ndërtojë një kullë, nuk ulet më parë të llogaritë shpenzimet, për të parë nëse ka mjaftueshëm për ta mbaruar? Që atëherë, kur t`i ketë hedhur themelet e të mos mundë ta përfundojë, të gjithë ata që e shohin, të mos fillojnë e të tallen, duke thënë: "Ky njeri filloi të ndërtojë e nuk mundi ta përfundojë".

Padyshim që ky është një parim i mirë përsa i përket ndërtimit, por Jezusi nuk po flet thjesht për ndërtimin këtu. Kulla për të cilën po flet këtu është jeta e një njeriu. Në fund të fundit, çfarë duan njerëzit nga jeta? Merr në pyetje sa njerëz të mundesh, në përfundim të gjithë duan të kenë një jetë të mirë, pa probleme, me pasuri, me paqe, me dashuri. Të gjithë njerëzit i dëshirojnë këto. Atëherë Jezusi na nxit që të bëjmë llogaritë për jetën tonë, që në fund të jetës të mos ngelemi bosh dhe njerëzit të tallen me ne, që kaluam një jetë të tërë duke punuar por në fund nuk arritëm të ndërtojmë diçka!

Le të shikojmë një pasazh tjetër:

Luka 12:15-21

Pastaj u tha atyre: ``Kini kujdes dhe ruhuni nga kopracia, sepse jeta e njeriut nuk qëndron në mbushullinë e gjërave që zotëron``.
Dhe ai u tha atyre një shëmbëlltyrë: ``Tokat e një pasaniku dhanë të korra të bollshme;
dhe ai arsyetonte me vete duke thënë: "Ç`të bëj, sepse nuk kam vend ku t`i shtie të korrat e mia?".
18 Dhe tha: "Këtë do të bëj: do të shemb hambarët e mia dhe do t`i bëj më të mëdhenj, ku do të shtie të gjitha të korrat dhe pasuritë e tjera,
19 dhe pastaj do t`i them shpirtit tim: Shpirt, ti ke pasuri të shumta të shtëna për shumë vjet; pusho, ha, pi dhe gëzo".
20 Por Perëndia i tha: "O i pamend, po atë natë shpirtin tënd do të ta kërkojnë dhe ato që përgatite të kujt do të jenë?".
21 Kështu i ndodh atij që grumbullon thesare për vete dhe nuk është i pasur ndaj Perëndisë``.

Këtu jepet historia e një njeriu që ishte i shqetësuar vetëm për të bërë sa më shumë para dhe nuk kishte fare interes për shpirtin e tij. Çdo gjë që ai bëri kishte të bënte me këtë jetë, dhe ai kishte goxha plane përpara. E dini si e quan Perëndia atë? I pamend! Po pse i pamend, sepse kishte shumë para? Padyshim që jo! Zoti nuk i thotë gjë për pasurinë, në fund të fundit ai kishte punuar tërë jetën për ato, por është i pamend sepse kishte llogaritur çdo gjë në planet e tij, përveç Zotit! Zoti është shumë i madh për t’u lënë jashtë planeve të një njeriu! Ky pasanik, kishte fortifikuar vilën e tij nga çdo vizitor i padëshiruar, përveç një vizitori, vdekjes! Ai i kishte marrë masat për çdo gjë, por ç’të bësh që vdekja nuk i kërkoi as leje as mendim se kur do të vinte. Ai njeri kaloi të tërë jetën duke u kujdesur se si mund të bënte sa më tepër para, që në fund as nuk i merr dot me vete, dhe kalon një përjetësi të tërë në ferr, jo për pasurinë që kishte, por sepse nuk kishte kohë të mendonte për Zotin.
Atëherë le të marrim lapsin dhe të bëjmë disa llogari. Dhe do të flasim shkoqur fare në këtë artikull, me shpresën se Zoti do t’i flasë ndonjë të pamendi që ka bërë planet për çdo gjë në jetë, përveç Perëndisë.
Atëherë, le të llogarisim pak çfarë do të fitojmë pa Zotin. Në fakt, e vërteta është që çdo gjë vjen nga Zoti edhe për ata që nuk besojnë në të. P.sh. Bibla thotë tek

Mateu 5:45

Sepse ai bën të lindë diellin e tij mbi të mirët dhe mbi të këqijtë, dhe bën të bjerë shi mbi të drejtët dhe të padrejtët.

Pra, është e qartë që Zoti i ka dhënë njerëzve disa bekime thjesht si një dhuratë nga Ai, pavarësisht nëse ata besojnë në të apo jo. P.sh. sa prej jush keni paguar për oksigjenin që thithni? Padyshim që jeta nuk mund të egzistojë pa oksigjen, por ne e marrim atë falas apo jo? Sa prej jush keni paguar për Diellin! Jeta pa diellin nuk mund të egzistojë, dhe përsëri ai na është dhënë falas nga krijuesi ynë. Megjithatë, nëse një njeri nuk i beson këto, le të shohim se çfarë mund të arrijë pa Zotin.
Maksimumi mund të arrijë të njëjtën gjë ashtu si pasaniku i historisë që pamë. Një jetë me çdo gjë që mund të dëshirojë, dhe ta rrethojë veten me çdo lloj lodre me çfarëdo lloj çmimi. Nuk është keq apo jo? Zoti i quan njerëz të tillë të pamend.

Çfarë të kushton po të pranosh Zotin? Nëse jeton në Shqipëri mund të të kushtojë shumë! Të gjithë ata që kanë jetuar në perëndim sado pak, apo thjesht krahasojnë korrupsionin në Shqipëri me atë të vendeve të tjera, e kuptojnë sa shumë të kushton në Shqipëri të pranosh Zotin dhe të jetosh një jetë të drejtë. Korrupsioni shtrihet që nga maja më e lartë e deri tek punëtori më i thjeshtë. Atëherë si mundet të jetosh në një shoqëri të tillë pa patur pasoja negative. Nuk merr dot një çertifikatë lindje nëse nuk i jep dikujt rrushfet, lëre pastaj për të tjerat! Të gjithë duan të të zhvasin sa më tepër. Nëse do të jetosh drejt, kjo do të kushtojë shumë, sepse shumica do jenë kundër teje dhe do të quajnë të çmendur nëse nuk vendos të bashkëpunosh me ata, ose të bëhesh tamam si ata. S’ka problem, edhe një herë, merre lapsin dhe bëni llogaritë sa do të humbisni po të pranoni Jezusin. Tani, le të marrin në konsideratë fundin e jetës. “Miku” i paftuar, vdekja, hyn në portat e blinduara të pasanikut dhe askush s’e pengon dot. Në mes të natës, në mes të planeve të mëdha 5-vjeçare, vdekja vjen dhe e përpin. Shpirti i tij shkon në ferr ku kalon përjetësinë. E morët shënim, vërini vetë çmimin! Sa të doni ju! Nga ana tjetër, ai njeri që pranoi Jezusin, për të vdekja është vetëm fillimi. Fillimi i përjetësisë me Perëndinë në parajsë, pa vuajtje, pa dhimbje, pa korrupsion, përjetësisht. Mbajeni shënim edhe këtë! Tani vërini çmimin edhe kësaj! Tani krahasoni njërin me tjetrin, dhe më thoni nëse nuk e kuptoni dot pse Perëndia e quajti atë njeri të pamend! Ju mund të debatoni se nuk besoni në Perëndi, dhe kjo histori është thjesht një përrallë. S’ka problem fare, por mbajeni shënim edhe këtë, sa për të thënë, se në fund të jetës, kur çdo gjë të marre fund, do të shohim se çdo të merrni me vete, dhe kush ka të drejtë!

Mendoni pak, shumica e shqiptarëve, nuk kanë kohë ose vend për Zotin në jetët e tyre! Atëherë bëjeni llogarinë, mbani shënime, dhe vendosni vetë si t’ju duket më mirë! Por dini këtë, sipas Biblës dhe Zotit të Biblës, ju jeni i pamend nëse nuk mendoni për shpirtin tuaj dhe për përjetësinë. Ju duket përralle? A i keni studiuar faktet që të keni arritur në këtë konkluzion? Apo thjesht s’keni kohë për ato? Ne kemi përkushtuar kohën tonë për të paralajmëruar ata njerëz që duan të dëgjojnë për seriozitetin e kësaj çështje! Mbi të gjitha, Zoti është i shqetësuar për përjetësinë tuaj, pse nuk shqetësoheni ju? Në qoftë se nuk keni menduar më parë për këtë, dhe tani vendoset që të dini më shumë për këtë, kliko këtu për të mësuar se si mund të pranosh Jezusin në jetën tënde dhe ta zgjidhësh një herë e përgjithmonë çështjen e përjetësisë së shpirtit tuaj.

Tani, le të flas pak për ata që e kanë pranuar Jezusin. A i keni bërë llogaritë për të ardhmen tuaj këtu? A është Zoti në planet e jetës suaj? Zotit i vjen për të vjellë nga gjithë besimtarët që ecin në mëkat më keq sesa paganët. Tek

Zbulesa 3:15-20 Bibla thotë:

Unë njoh veprat e tua, që ti nuk je as i ftohtë as i ngrohtë. Do të doja të ishe i ftohtë ose i ngrohtë!
16 Por, mbasi je kështu i vakët, dhe as i ftohtë e as i ngrohtë, unë do të të vjell nga goja ime.
17 Sepse ti thua: "Unë jam i pasur, u pasurova dhe s`kam nevojë për asgjë"; edhe nuk e di se ti je qyqar e mjeran, i varfër, i verbër dhe i zhveshur.
18 Të këshilloj të blesh nga unë ar të kulluar në zjarr që të bëhesh i pasur; edhe petka të bardhë që të vishesh dhe të mos duket turpi i lakuriqësisë sate; edhe vajos sytë e tu me kolir, që të shohësh.
19 Unë të gjithë ata që i dua i qortoj dhe i ndëshkoj; prandaj ji i zellshëm dhe pendohu.
20 Ja, unë qëndroj te dera dhe trokas; nëse dikush dëgjon zërin tim dhe të hapë derën, unë do të hyj tek ai dhe do të ha darkë me të dhe ai me mua.

A kini bërë llogaritë së çfarë do t’ju kushtojë po të vazhdoni të ecni drejt me Zotin, pa mëkat, pa kompromentuar? Eshtë çmim i lart apo jo? Cili është vendimi juaj? Juda e shiti Zotin për 30 monedha argjendi! Sa është çmimi ynë? Për sa e shesim ne Zotin? Unë nuk numëroj dot ata besimtarë që tani jetojnë komplet në botë dhe në mëkat. Ata i bënë llogaritë, dhe e panë që të ecje me Jezusin do t’i kushtontë shumë, do t’i kushtonte famën, krenarinë, mëkatet e fshehta, ndoshta karrierën, dhe vendosën që ky çmim ishte shumë më i lartë sesa ata donin të paguanin, dhe e shiten Zotin për më pak se 30 monedha argjendi! Çfarë vendi ka Zoti në planet e jetës suaj?

Ky artikull nuk ka aspak si qëllim që të drejtojë gishtin ndaj ndonjë individi, por tema që po trajtojmë është e tillë. Shqipëria ka nevojë për besimtarë që të bëhen shembull për të tjerët për të fituar shqiptarët për Krishtin, atëherë thirrja jonë është që nëse ju si besimtarë keni rënë dakort me këtë vizion që ne kemi paraqitur në këtë website, atëherë na ndihmoni që të arrijmë këtë vizion. Zoti ju bekoftë.